Un spazi par so cont lu merete dal sigûr Achille Tellini, un personaç une vore impuartant pal Friûl ancje se discognossût de plui part dai furlans ...

Uno spazio riservato lo merita certamente Achille Tellini, un personaggio molto importante per il Friuli anche se sconosciuto alla maggioranza dei friulani ...

Gjavât fûr di PUP, CARLI 2006: Memoriis platadis. Olmis di storie te narative popolâr furlane. Feagne: Edizions Associazion Culturâl “El Tomât”

Achille Tellini (1866 – 1938) traduzione in italiano sotto

Un spazi par so cont lu merete dal sigûr Achille Tellini, un personaç une vore impuartant pal Friûl ancje se discognossût de plui part dai furlans [1]. Nassût tal 1866 intune famee siore de borghesie udinese, si lauree a Turin e, daspò di une parentesi a Rome, tal 1894 lu cjatìn insegnant a Udin tal Istitût Tecnic “A. Zanon”. Tellini al à milante interès, dongje di insegnâ, al publiche studis di siencis naturâls (gjeologjie, idrologjie, speleologjie, gjeografie, zoologjie e v.i.) e su altris argoments, al è un dai oms di prin plan de “Società Alpina Friulana”, al fonde il “Circolo Idrologico e Speleologico Friulano”, e v.i.

Tor dal 1907 une vicende personâl lu oblee a trasferîsi a Bologne, là che al met sù une librarie anticuarie e une buteghe filateliche. Tellini al devente un esponent di prin plan dal esperantisim talian. L’esperanto al rispuint a di une logjiche di comunicazion internazionâl fondade sul rispiet: si trate di une lenghe inventade, si podarès dî “neutrâl”, che si zonte ae lenghe proprie di une persone e che e je lontane di ogni forme di imperialisim. Intant al cres simpri di plui ancje il so interès pe lenghe furlane. Cubiant l’interès par chestis dôs lenghis tal 1912 al publiche “Leksikona komparo inter lingvoj esperanta kaj friula” e sarà stampade invezit tal 1935 la “Gràmatiche, vocabulari ed eserciçis di lenghe internaçional esperanto pai ladìns furlàns”.

Ae vilie de prime vuere mondiâl, tune clime simpri plui imboreçade e imbombade di nazionalisim talian, dut câs, la sô ativitât lu met al centri di acusis e di atacs une vore pençs. Intant Tellini al madrès un pinsîr politic che lu puarte a sburtâ par une federazion ladine indipendente, cun dentri un Friûl libar di pandi ad in plen la sô identitât nazionâl. Tal 1919 al publiche chel che si pues considerâ il prin program politic nazionalitari furlan, inte suaze di chel grant lavôr di ricercje e di racuelte che al è il so “Il tesaur de lenghe furlane”. Tai prins agns ‘20 al publiche la riviste “La Patrje Ladine”, che e je il spieli de sô ativitât culturâl e politiche.

Tal 1928 al torne a Udin e al cîr di puartâ indenant la sô bataie, ancje se aromai i spazis di libertât a son simpri di mancul. Al è ta chescj agns che si svilupe il rapuart cun Felix Marchi, altri om di ponte dal pinsîr nazionalitari furlan.

Il messaç e il spirt di Tellini, vêr pari dal moviment nazionalitari furlan, si ricjatin ta cheste frase che al scriveve ancjemò tal 1922: “Cuant che la gnove gjenerazion e sarà imbevude fin a la medole di tâl spirt di indipendence e a si sarà formade une salde cussience nazionâl, che finore e mancje ancje tes personis studiadis, i Furlans no formaran plui une ecezion fra ducj i popui de tiere, comprindûts i altris Ladins, e la pome de libertât, completamentri madure, e colarà a la plui lizere bavesele.” [2]

[1] Par cognossi miôr la vite e la opare di Achille Tellini si sugjerìs la leture dai articui publicâts ta chescj ultins agns di Donato Toffoli. Al è pôc che e je stade tornade a publicâ une part dal lavôr di racuelte su filastrocjis, ninenanis e cjantarelis curade dal stes Tellini.

[2] Gjavât fûr de riviste “Patrje Ladine” (dispensis 6-18) publicade a Sant Vît dal Tiliment tal 1922. In mert si pues viodi ancje: TOFFOLI, DONATO 1990: Par une storie dal moviment natsionalitari furlan. –  In Usmis. Riviste par une gnove culture furlane e planetarie, n. 0.

Estratto da PUP, CARLI 2006: Memoriis platadis. Olmis di storie te narative popolâr furlane.

Fagagna: Edizioni Associazione Culturale “El Tomât”.

Achille Tellini (1866 – 1938)

Uno spazio riservato lo merita certamente Achille Tellini, un personaggio molto importante per il Friuli anche se sconosciuto alla maggioranza dei friulani (1). Nato nel 1866 in una ricca famiglia della borghesia udinese, si laurea a Torino e, dopo una parentesi a Roma, nel 1894 lo troviamo insegnante a Udine presso l'Istituto tecnico “A. Zanon”. Il Tellini, oltre all'insegnamento, vanta interessi in innumerevoli campi e pubblica studi di scienze naturali (geologia, idrologia, speleologia, geografia, zoologia ecc.) e di altri argomenti, è un importante personalità della “Società Alpina Friulana”, fonda il “Circolo Idrologico e Speleologico Friulano” ecc.

Verso il 1907, una vicenda personale lo obbliga a trasferirsi a Bologna dove apre una libreria antiquaria ed un negozio di filatelia. Il Tellini diventa un esponente di primo piano dell'esperantismo italiano. L'esperanto risponde ad una logica di comunicazione internazionale fondata sul rispetto; si tratta di una lingua inventata, si potrebbe definire “neutrale”, che va ad aggiungersi alla lingua propria di una persona e che è lontana da ogni forma di imperialismo.

Nel mentre, va aumentando sempre più il suo interesse per la lingua friulana. Coniugando l'interesse per queste due lingue, nel 1912 pubblica “Leksikona Komparo inter lingvoj esperanta kaj friula”; nel 1935 verrà data alle stampe invece la “Gràmatiche, vocabulari ed eserciçis di lenghe internaçional esperanto pai ladìns furlàns” (Grammatica, vocabolario ed esercizi di lingua internazionale esperanto per i ladini friulani).

Tuttavia, alla vigilia della prima guerra mondiale, in un clima sempre più rovente ed intriso di nazionalismo italiano, la sua attività lo pone al centro di accuse e di attacchi alquanto pesanti. Tellini, nel frattempo, matura un pensiero politico che lo porta a proporre una federazione ladina indipendente, comprendente un Friuli libero di esplicare appieno la propria identità nazionale.

Nel 1919 pubblica quello che si può considerare il primo programma politico nazionalitario friulano, nell'ambito di quel grande lavoro di ricerca e di raccolta che è il suo “Il tesaur de lenghe furlane” (Il tesoro della lingua friulana). All'inizio degli anni '20 pubblica la rivista “La Patrje Ladine” (La Patria Ladina) che ne rispecchia l'attività culturale e politica.

Nel 1928 ritorna ad Udine e cerca di proseguire la sua battaglia anche se, ormai, gli spazi per potersi muovere liberamente sono sempre più esigui. E' proprio in questi anni che si instaura il rapporto con Felix Marchi, altro uomo di punta del pensiero nazionalitario friulano.

Il messaggio e lo spirito di Tellini, vero padre del movimento nazionalitario friulano, si ritrovano in questa frase che scrisse nel lontano 1922. “Cuant che la gnove gjenerazion e sarà imbevude fin a la medole di tâl spirt di indipendence e a si sarà formade une salde cussience nazionâl, che finore e mancje ancje tes personis studiadis, i Furlans no formaran plui une ecezion fra ducj i popui de tiere, comprindûts i altris Ladins, e la pome de libertât,completamentri madure, e colarà a la plui lizere bavesele” (Quando la nuova generazione sarà intrisa fino al midollo di tale spirito di indipendenza e si sarà formata una salda coscienza nazionale, che finora manca anche nelle persone istruite, i Friulani non costituiranno più un'eccezione fra tutti i popoli della terra, compresi gli altri Ladini, ed il frutto della libertà, completamente maturo, cadrà al primo alito di vento. (2)

(1) Per conoscere meglio la vita e l'opera di Achille Tellini si suggerisce la lettura degli articoli pubblicati negli ultimi tempi da Donato Toffoli. Di recente è stata ripubblicata una parte del lavoro di raccolta di filastrocche, ninne nanne e rime curata dallo stesso Tellini.

(2) Estratto dalla rivista “Patrje Ladine” (dispense 6-18) pubblicata a San Vito al Tagliamento (PN) nel 1922. All'uopo vedasi anche: TOFFOLI, DONATO 1999: Par une storie dal moviment natsionalitari furlan. - In Usmis. Riviste par une gnove culture furlane e planetarie, n. 0.